Почнаа годинашните археолошки истражувања и конзервација во локалитетот Стоби, откако од Министерството за култура одобрија пари за пет проекти. Тоа се конзервација на резиденцијален и комерцијален кварт од рановизантиско Стоби, конзервација на Јужен бедем и Јужна порта близу храмот на Изида, реконструкција на плоштадот, доистражување и реконструкција на Римски театар и реконструкција на Епископска базилика.
„Годинашниве истражувања на комплексот Епископски базилики вклучуваат простор кој е надвор од нив. Пробуваме, се обидуваме да стигнеме до објект кој треба да е поран од Епископската базилика. Според истражувањата од 70 години, долу се пронајдени остатоци од бања. Со годинашниве истражувања ќе се обидеме да потврдиме постоел или не“ , вели археологот Димитар Николовски.
Од НУ „Стоби“ според првите впечатоци, годинава очекуваат повеќе гости од рекордната 2018. (Фото: СДК.МК)
Од година во година, средствата кои се добиваат од Министерството за култура се сѐ помали и помали, иако цените на материјалите за работа се зголемени, што го скратува периодот за работа на археолозите. Работите на Римскиот театар, годинава 11. по ред продолжуваат. Тоа што посетителите можат да го видат е само четвртина од гледалиштето, кое собирало седум илјади гледачи. Се работи да се врати дел од сјајот од некогашниот објект.
„Годинава работиме на супструкцијата, горниот дел на гледалиштето, каде публиката циркулирала пред да седне на седиштата. Останува 20 отсто од откриените ѕидови да се конзервираат. Целта е да добиеме податоци за театарот за неговата изградба, неговата употреба. Долниот дел од гледалиштето имал 18 редови а горниот 14 до 17. Театарот бил главното обележје на Стоби, место каде се одвивал јавниот живот, освен театар имало и гладијаторски борби“ , вели археологот Гоце Павловски.
И годинава продолжува конзервацијата на Теодосијанската палата, кој се реализира со грант од 300 илјади долари од Фондацијата Каплан од САД, а треба да заврши следната година.
Почетокот на археолошките работи годинава ја отвори сезоната на посетители. Од НУ „Стоби“ според првите впечатоци, очекуваат повеќе гости од рекордната 2018.
П. ПЕЧКОВ
ИЗВОР: sdk.mk
