Денес Орце Ѓорѓиевски, кандидат за градоначалник на Град Скопје, заедно со кандидатот за градоначалник на Кисела Вода, Бети Стаменкоска-Трајкоска, ја посетија домашната инвестиција „Мако Маркет“, која се истакнува како пример за успешна македонска приказна.
Во моментов се завршуваат подготовките за започнување на една од најголемите инвестиции за производство на кондиторски производи во регионот, како и современ логистички центар на површина од 22.000 м². Вредноста на инвестицијата изнесува 20 милиони евра и се очекува да создаде дополнителни 300 работни места.
„Горди сме што стануваме сведоци на вакви проекти, домашна инвестиција со странски партнер која носи економски раст, нови работни места и извоз што ја зајакнува македонската економија“, изјави Ѓорѓиевски.
Тој додаде дека институциите се тука да обезбедат поддршка во административната логистика, создавање подобри услови и охрабрување на секоја нова инвестиција.
„Нека се множат ваквите успеси! За Кисела Вода и за Скопје кое расте, се развива и станува место на нови можности“, порача Ѓорѓиевски.
