Нова драма околу учеството на селекцијата на Иран на претстојниот Мундијал. Имено претседателот на Иранската фудбалска федерација (ФФИ), Мехди Таи, ја повика ФИФА да даде гаранции дека нивната делегација нема да биде подложена на навреди на Светското првенство во САД, објави иранската новинска агенција ИРНА.
„За да учествуваме на турнирот, бараме гаранции од ФИФА дека некои инциденти од минатото нема да се повторат“, изјави Таи за новинарите.
Шефот на иранската фудбалска федерација рече дека учеството на неговата земја на Светското првенство зависи од претстојната средба со претседателот на ФИФА, Џани Инфантино, каде што ќе бара земјата домаќин да обезбеди целосно почитување на иранската делегација. „Доколку се одржи целосно почитување и не се упатат навреди, особено кон официјалните и воените институции на земјата, нема да имаме проблем со учеството“, додаде Таи, очигледно мислејќи на Иранската револуционерна гарда (ИРГЦ), која САД ја сметаат за терористичка организација.
„Немаме никакви врски со САД, тимот заслужено го заработи правото да учествува на првенството, а наш домаќин е ФИФА, а не претседателот на САД Доналд Трамп. Доколку во таа земја се упати каква било навреда, сигурно ќе реагираме на ист начин како што реагиравме во Канада. Сосема е можно тимот да се врати дома во тој случај“, рече претседателот на ФФИ.
Таи беше висок функционер на ИРГЦ пред да стане претседател на Иранската фудбалска федерација.
Извор: vecer.mk
