Нетанјаху: Немаме друг избор освен да продолжиме да се бориме

Палестински функционер запознаен со преговорите за прекин на огнот за Би-би-си изјавил дека Египет претставил нов план во три фази што ќе започне со двонеделно хуманитарно примирје, кое може да се продолжи, а за кое Хамас ќе треба да ослободи 40 заложници, а Израел 120 палестински затвореници

Израелскиот премиер Бенјамин Нетанјаху денеска изјави дека Израел плаќа многу висока цена за војната во Газа, пренесува Си-ен-ен.

Според него, минатата сабота била еден од најсмртоносните денови од почетокот на војната во Газа, но посочил дека немале друг избор освен да продолжат да се борат.

„Ова е тешко утро, по многу тежок ден на борби во Газа“,

рече тој.

Но, посочи и дека неговите сили ќе продолжат да војуваат до крај, повторувајќи ги своите цели за елиминација на Хамас и обезбедување безбедно враќање на заложниците кои се држат во Газа.

„Нека биде јасно, ова ќе биде долга војна“,

додаде израелскиот премиер.

Во меѓувреме, Министерството за здравство на Газа, управувано од Хамас, соопшти дека пред два дена 70 луѓе биле убиени во напад врз бегалски камп.

„Повеќе од 20.000 луѓе се убиени – главно жени и деца, а 54.000 се повредени во Газа од 7 октомври“,

соопшти Министерството.

Израелската операција започна откако борците на Хамас преминаа од Газа во јужен Израел на 7 октомври, убивајќи 1 200 луѓе и зедоа околу 240 заложници.

Израел инсистира да преземе чекори за да избегне цивилни жртви и го обвинува Хамас дека се вградува во густо населените области.

Според Белата куќа, Американскиот претседател Џо Бајден во разговор со израелскиот премиер ја нагласил потребата да се заштитат животите на цивилите.

Бајден изјави и дека не побарал прекин на огнот.

Во петокот, Советот за безбедност на ОН одобри резолуција со која се бара испорака на помош од големи размери за Газа.

Разговорите одржани во Египет беа со цел да обезбедат ново примирје меѓу Израел и Хамас, но тие досега не дадоа резултати.

Палестински функционер запознаен со преговорите за прекин на огнот за Би-би-си изјави дека Египет претставил нов план во три фази кој ќе започне со двонеделно хуманитарно примирје, кое може да се продолжи, а за кое Хамас ќе треба да ослободи 40 заложници, а Израел 120 палестински затвореници.

По оваа фаза би следело формирање на независно тело кое ќе се занимава со хуманитарна помош и реконструкција, како и сеопфатен прекин на огнот и размена на затвореници.