Институтот за јавно здравје (ИЈЗ) соопшти дека нема отстапувања од нормалните референтни вредности на радијацијата во почвата и воздухот по пожарот што се случи во Трубарево.
Според ИЈЗ, во текот на вчерашниот ден е испратен обучен експертски тим за вонредна контрола во засегнатото подрачје, кој земал примероци од вода, почва и воздух за испитување на радиоактивност и за физичко-хемиска анализа.
Резултатите покажуваат дека воздухот и почвата се во нормални вредности, без отстапувања. Во примероците од вода нема одстапувања во однос на тешки метали, иако е забележан индикатор за зголемена содржина на органски материи во подземната вода, кои потекнуваат од други извори.
Резултатите од мострите за радијација во вода и за присуство на тешки метали во почвата ќе бидат достапни утре. ИЈЗ продолжува да соработува со Инспекторатот за животна средина, Министерството за здравство и другите надлежни институции за континуирана контрола на состојбата.
