Поранешниот амбасадор Васко Наумовски во 24 анализа рече дека Трамп во неговиот втор мандат се очекува да биде многу радикален. Според него, тој има отворени раце за остварување на своите предизборни ветувања бидејќи граѓаните на САД му дадоа голема поддршка.
„Се посветува на своите ветувања од предизборната кампања и најави потпишување на извршни наредби со што од прв ден почнува со своите политики и сака да покаже контраст од водењето на Бајден. Прашањата за родовите, мигрантите и војните сметам дека многумина и внатре и надвор од САД ќе ги остават изненадени за тоа колку Трамп ќе биде радикален“, рече Наумовски и додаде дека очекува Трамп да побара уште еден мандат за да може да оствари се.
Тој зборуваше и за присуството на македонската делегација на чело со премиерот Христијан Мицкоски на инаугурацијата на новиот американски претседател Доналд Трамп. Според него не е важно кој не поканил туку важно е дека нашата делегација е таму.
„Мислам дека треба да бидеме задоволни што го имаме премиерот и делегацијата таму, кога имаат прилика во името на Македонија да се среќаваат и со поранешни и со идни функционери, луѓе од најблиското опкружување на Трамп и средби со претставници од бизнис заедницата, треба да ги претстават ставовите на Македонија и да ги доближат до белата куќа“, потенцираше Наумовски.
Извор: 24vesti.mk
