Националниот џез-оркестар ќе гостува на фестивалот „Сплитско лето“, настан во организација на Хрватскиот народен театар.
– Овој концерт ја отвора новата сезона на интернационални гостувања за Националниот џез-оркестар, со што оркестарот ја зацврстува својата позиција на меѓународната музичка сцена преку иновативен пристап и силна уметничка визија. Публиката во Сплит ќе има ретка можност да ужива во уникатна програма што го поврзува современиот џез со традиционалното португалско фадо – во изведба на Националниот џез-оркестар и извонредната вокалистка Мариа Мендеш, под диригентство на маестро Владимир Николов, појаснуваат од Националниот џез-оркестар на Република Северна Македонија.
Се додава дека соработката на Националниот џез-оркестар со Мариа Мендеш започнала со незаборавниот концерт во Скопје, во март оваа година.
Настапот на „Сплитско лето“ носи повеќе од музика, се нагласува во соопштението, тој е израз на културна размена, меѓународна поврзаност и внимателно претставување на македонската уметничка сцена пред европската публика.
ИЗВОР: racin.mk
