Народниот правобранител Фатон Сељами денеска влезе во затворот ,,Скопје” во Шуто Оризари, каде што се сретна со раководството на затворот, но и со осуденици кои се жалеа на насилство.
-Народниот правобранител м-р Фатон Сељами, заедно со тимот од Механизмот за граѓанска контрола оствари средба со директорот на КПУ Затвор Скопје г.Бобан Утковски и заменик директорот г.Баки Мустафи. Целта на средбата беше да се добијат подетални информации за текот на вчерашниот претрес од страна на припадници на Единицата за интервенции на затворската полиција, која е под директна надлежност на Управата за извршување на санкции, велат од канцеларијата на Народниот правобранител.
Правобранителот Сељами директно разговарал и со дел од затворениците.
-Воедно, Народниот правобранител ги посети и разговараше со дел од затворениците кои беа предмет на претресот. Притоа, акцентот при посетата беше ставен на начинот на кој постапувале припадниците на оваа единица, односно дали при вршењето на претресот биле испочитувани процедурите и стандардите утврдени со актите по кои истата работи, а во насока на утврдување дали имало или не, пречекорување на службените овластувања, односно дали била употребена прекумерна сила.
Во текот на денешниот ден, тимот на Механизмот за граѓанска контрола ќе го продолжи процесот на испитување на случајот, а Народниот правобранител за констатациите по истиот во наредниот период дополнително ќе ја извести јавноста за дејствијата кои ги презел и кои ќе ги преземе во иднина, велат од кај Народниот правобранител.
Извор: zurnal.mk
