Во две одвоени акции на Крајбрежната служба на Грција во морскиот дел во близина на Крит биле спасени 110 мигранти кои се превезуваче во два чамци, а на островот Гавдос, јужно од Крит биле откриени 46 лица, јави дописничката на МИА од Атина.
Според информациите во локалните медиуми од Крит и од Крајбрежната служба на Грција јужно од островот во период од само неколку часа биле откриени два чамци со 59 и 51 лице, додека пак мигрантите на Гавдос, вкупно 46 лица, стигнале сами на копно.
Претседателот на Унијата на вработени во крајбрежната служба во источен Крит Јоргос Сфакианакис за критското радио 98,4 нагласи дека се очекува оваа година да има рекорден број нелегални пристигнувања на островот, објаснувајќи дека во 2024 година околу 5.100 мигранти поминале низ морската област на Крит, а сега се проценува дека бројот би можел да достигне и до 25.000 до крајот на годинава.
Дополнително истакна дека морскиот дел јужно од Крит е особено тежок за спасувачки акции, поради големото растојание од пристаништата, силните ветрови, но и големите бранови.
Островите Крит и Гавдос на југот од Грција се дел од јужната мигрантска рута што ја користат криумчарите, кои тргнуваат од бреговите во Либија.
Извор: vecer.mk
