Policia e Kosovës bëri të ditur se gjatë kontrolleve të shtuara në parandalimin e aktiviteteve të kundërligjshme ndërkufitare, në pikën e kalimit kufitar në Jarinjë janë ndaluar dy persona për kontrolle të mëtejshme.
Sipas Policisë, zyrtarët kufitarë kanë ndaluar në vijën e dytë për kontroll një automjet me targa të Serbisë, në të cilin ndodheshin dy persona, pasi kanë pasur dyshim të bazuar.
Gjatë kontrollit të automjetit, Policia njoftoi se janë gjetur dhe sekuestruar pesë thika, dy prej të cilave taktike-luftarake, një kamerë GoPro me mbajtës, dy pajisje multifunksionale dhe dy bluza me simbole e mbishkrime nacionaliste.
Në mesin e materialeve të gjetura, sipas Policisë, ishin edhe një flamur i Serbisë, një vulë me katër “S” dhe mbishkrimin “Udruzenje Ljubitelja Srednjovekovnih Borilackih Sportova, Sremski Karlovci”, si dhe një kartë identiteti.
Me autorizim të Prokurorit të Shtetit, Policia ka bërë të ditur se është iniciuar rasti “Mbajtja në pronësi, kontroll ose posedim të paautorizuar i armëve”.
Dy personat e dyshuar janë dërguar në mbajtje, ndërsa rasti është duke u trajtuar nga organet kompetente.
Burimi: botasot
