На изборите се почнува од нула. Што се однесува до анкетите тие се резултат на нашето емотивно реагирање. Но, да се соберат гласови не е лесна работа. Секако дека поинтересно ќе биде да се следат случувањата во албанскиот блок, но интересно е и колкава ќе биде разликата помеѓу опозицијата и власта, вели политичкиот аналитичар Алберт Муслиу во емисијата 24 анализа на ТВ 24.
– Кај граѓаните тензиите подолго остануваат отколку кај политичартите. Јас би ги повикал граѓаните да излезат на гласање, оти со негласање му помагаат некому кому можеби не сакаат, вели Муслиу.
Тој вели дека одамна немаме политички говори од политичари кои ќе ги мотивираат граѓаните туку имаме негативни наративи.
– Левица и Знам може да го расипат или да го поправат пазарот. На денот на избори секој може да победи, а во општество каде реакциите се менуваат на неколку дена не може во бројки да се процени иако очигледно е дека анкетите покажуваат водство на ВМРО-ДПМНЕ. Но, не сум сигурен дека тоа водство е двојно или тројно, вели Муслиу.
Тој потврдува дека е очигледно незадоволство кај граѓаните и повикува сите да учествуваат трезвено на изборите, оти и со гласање и со негласање се влијае на исходот од изборите.
– Алијанска беше сериозна партија со сериозна структура и 8 пратеника и во суштина единствен сериозен опонент на ДУИ. Со она што ѝ се случи приматот што го имаа се распрснува, а зависноста на партијата од другите два блока се зголемува, – вели Муслиу кој додава дека станува збор за гласачи кои отсекогаш биле анти-естаблишмент.
Муслиу се согласува со Божиновски дека вкупно албански пратеници би имало до 30.
Извор: 24vesti.mk
