Мицотакис по изборните резултати: Ќе ги продолжам клучните реформи со забрзано темпо

Мицотакис истакна дека гласачите ги отфрлиле „лагите и токсичната атмосфера што го подели општеството“ и вети дека ќе биде премиер на „сите Грци“

Грчкиот премиер Киријакос Мицотакис и лидер на Нова демократија по победата на партијата на денешните парламентарни избори изјави дека е задоволен од „сигурното мнозинство“ што го освои и вети дека ќе продолжи со клучните реформи со забрзано темпо.

„Ќе останам верен на мојата национална должност и нема да толерирам ароганција или вообразено однесување“,

рече тој, пренесува Катимерини.

Мицотакис истакна дека гласачите ги отфрлиле „лагите и токсичната атмосфера што го подели општеството“ и вети дека ќе биде премиер на „сите Грци“.

Првите официјални резултати покажуваат дека Нова демократија е победник на денешните парламентарни избори во Грција, кои на Мицотакис му обезбедуваат нов четиригодишен мандат. Врз основа на 91 отсто преброени гласови, според податоците на Министерството за внатрешни работи, постои голема веројатност оваа конзервативна партија да има 158 пратеници во 300-члениот парламент.

Тоа е за 20 отсто повеќе од второпласираната партија Сириза на радикалната левица, која победи на изборите во 2015 година и ја водеше земјата до 2019 година, кога загуби од Нова демократија.

Денешното гласање е второ големо во изминатите пет недели, бидејќи никој не успеа да освои мнозинство во парламентот на изборите на 21 мај.

Според сегашниот изборен систем, најдобро рангираната партија врз основа на гласови добива бонус пратенички места, од 20 до 50, во зависност од резултатите.