КУДС (АА) – Израелскиот министер за енергетика, Израел Кац, изјави дека наложил прекинување на снабдувањето со вода во Појасот Газа, пренесува Анадолу.
„Сите цевки за водоснабдување од Израел до Појасот Газа се исклучени“, изјави Кац, јави израелскиот Канал 12.
Тој нагласи дека снабдувањето со електрична енергија и гориво на Газа е прекинато уште пред два дена.
Последниот потег доаѓа откако израелскиот министер за одбрана, Јоав Галант, вчера донесе одлука да воведе „целосна“ опсада на Газа, велејќи дека струја, храна, вода и гориво нема да стигне до Појасот Газа.
Од саботата Израел ги затвори сите премини со Појасот Газа во двата правца.
Палестинската група на отпорот, Хамас, со седиште во Газа, во саботата наутро започна операција против Израел наречена „Поплава Ал Акса“ истрелувајќи бараж ракети. Се наведува дека ненадејниот напад е одговор на упадот во џамијата „Ал Акса“ во окупираниот Источен Кудс (Ерусалим) и зголеменото насилство од страна на еврејските доселеници врз Палестинците.
Како одмазда, израелската војска ја започна операцијата „Железни мечеви“ против Хамас во Појасот Газа.
Бројот на Палестинци кои загинаа во нападите на израелските сили во Газа се искачи на 704, од кои 143 деца и 105 жени, соопшти рано утрово Министерството за здравство во Газа. Се наведува дека бројот на ранети пораснал на околу 4.000.
Според израелското Министерство за здравство, во борбите загинале најмалку 900 Израелци, а над 2.600 се ранети.
