Машката одбојкарска репрезентација на Македонија во мирна атмосфера во Маврово обработува дел од подготовките за претстојните квалификациски натпревари. Стручниот штаб на чело со селекторот Јошко Миленковски ги реализираат планираните задачи со по два тренинга дневно.
– Јасно е дека фокусот е на Грција, која е и наш прв противник во вториот дел од евро-квалификациите и тоа е натпревар, во кој треба да го дадеме нашиот максимум. Секој поен, сет, бод ќе биде плус за нас во одлуката кој ќе патува на Европското првенство. Тие се добар противник, но и ривал со кој може да играме и да се носиме. Ќе имаме квалитетни подготвителни натпревари за кревање на формата со противници по мерка, условите и во Маврово се на највисоко ниво, а не се сомневам дека така ќе биде и во Скопје. Наше е само да го дадеме најдоброто од нас и што поподготвени да влеземе во дуелите со Грција и со Грузија и на крај на циклусот да се радуваме на пласман на уште едно Европско првенство, изјави репрезентативецот Владо Милев.
Репрезентација ќе продолжи со тренинзи во Маврово, а ќе одигра и два контролни натпревара со Бугарија во Софија. Македонија на 13.август игра на гости против Грција, а на 17.август ја пречекува Грузија во Скопје. (МИА)
Извор: kurir.mk
