Министерството за енергетика, рударство и минерални суровини (МЕРМС) информира дека наплатата на надоместоците за експлоатација на минерални суровини во вториот квартал од 2025 година достигна рекордни 260 379 123 денари. Ова, како што наведуваат, претставува значително зголемување во однос на истиот период во 2024 година, кога беа наплатени 133 576 534 денари.
– Овој успех следи по исклучителните резултати од првиот квартал од 2025 година, кога беа наплатени 260 327 223 денари, што е повеќе од двојно во споредба со 110 576 324 денари во првиот квартал од 2024 година. Збирно, за првите шест месеци од 2025 година, Министерството оствари наплата од над 500 000 000 денари, што е историски успех во управувањето со природните ресурси на Република Македонија, се вели во соопштението.
Министерството очекува оваа бројка да расте со оглед на фактот дека се испратени опомени до концесионерите кои се уште не ја регулирале обврската да го сторат тоа во рокот.
– Овие резултати се директна последица на посветените активности на Министерството за подобрување на наплатата и зајакнување на контролата врз обврските на концесионерите, вклучувајќи: засилени инспекциски контроли: редовни и вонредни теренски проверки за обезбедување усогласеност со законските обврски, писмени опомени и санкции: испратени се предупредувања до концесионерите за навремено подмирување на обврските, со едностран раскин на договори за оние кои не ги почитуваат законите. Во тек се постапки за раскин на уште десетина договори. Нов рарифник од 1 јануари 2025: воведен е нов тарифник кој ја зголеми висината на надоместоците до 100 отсто, обезбедувајќи правична вредност за користење на природните ресурси. Клучните измени вклучуваат: зголемување на надоместокот за користење простор за експлоатација за околу 30 отсто, надоместок за експлоатација на мермер: пет отсто од приходот од продадената суровина, зголемување на надоместокот за метални минерални суровини од два на четири отсто, просечно зголемување над 100 отсто за неметалични минерални суровини, се вели во соопштението.
Овие измени, како што нагласуваат, не се однесуваат на енергетските минерали, како јагленот, со цел да се заштитат граѓаните од дополнителен притисок врз цените на електричната енергија.
Според ресорното министерство, зголемената наплата директно придонесува за зголемување на буџетите на општините каде работат концесионерите, како и на државниот буџет.
– Овие средства се инвестираат во: изградба и одржување на комунална инфраструктура, проекти за енергетска транзиција и одржлив развој и иницијативи за заштита на животната средина. Министерството за енергетика, рударство и минерални суровини останува посветено на воспоставување на највисоки стандарди за транспарентно и фер управување со природните ресурси. Овие резултати се доказ за нашата определба да ги зајакнеме економските придобивки од експлоатацијата на минералните суровини, истовремено обезбедувајќи одржлив развој и поддршка за локалните заедници, стои во соопштението.
Извор: 24vesti.mk
