БАГДАД / АНКАРА (АА) – Висок функционер на Арапската лига денес потврди дека меѓународната Kонференција за решение со две држави за Палестина ќе се одржи во јуни под заедничко претседателство на Саудиска Арабија и Франција, известува Анадолу.
„Конференцијата за признавање на државата Палестина ќе се одржи од 17 до 20 јуни, на која копретседатели ќе бидат Саудиска Арабија и Франција“, изјави помошникот генерален секретар на Арапската лига, Хосам Заки, на прес-конференција во Багдад, каде што на 17 мај (сабота) ќе се одржи 34-от Арапски самит, но не ја прецизираше локацијата на толку значаен настан.
Арапскиот самит се одржува во време на тековниот геноцид што Израел го спроведува во Појасот Газа, во кој од октомври 2023 година досега се убиени над 53.000 Палестинци, од кои повеќето се жени и деца.
Според Заки, конференцијата има за цел „спроведување на претходно усвоената резолуција на Генералното собрание на ОН и забрзување на решението за две држави (Палестина и Израел), покрај истражувањето на начини за материјализирање на палестинската држава на терен“.
Тој истакна дека конференцијата „ќе биде сериозна и сеопфатна“, бидејќи ќе ги разгледа политичките, економските и социјалните аспекти на палестинското прашање од сите агли.
Заки очекува некои земји на конференцијата да ја признаат државата Палестина, што би имало „значајно политичко влијание“.
Во април, францускиот претседател Емануел Макрон објави дека неговата земја може да ја признае Државата Палестина во наредните месеци, истакнувајќи дека тоа би можело да се случи на меѓународна конференција за решението со две држави во јуни, но не го прецизираше местото на одржување.
Извор: Anadolu Agency (AA)
