Коалицијата ВРЕДИ (ВЛЕН) на 9-ти мај ќе одржи обединувачки конгрес преку кој ќе прерасне во една политичка партија со центар-десно ориентирана идеологија. Ова го најави еден од лидерите на коалицијата, Изет Меџити, во гостувањето во дневникот на телевизија Сител, каде што зборуваше за новата структура на партијата, претстојната владина реконструкција, евроинтеграциите и укинувањето на Пржинската влада].
Меџити посочи дека обединувањето во една партија има за цел да донесе вистинска конкуренција на политичката сцена. „ВЛЕН направи се, монополизирана албанската сцена, значи политичка сцена во Македонија да се воведе конкуренција, да се укине тој монопол ДУИ над 20 години“, изјави Меџити, нагласувајќи дека силната опозиција е во интерес на народот и гласачите. Изборот на 9-ти мај за конгрес не е случаен, бидејќи симболизира посветеност кон европските вредности кои се нивен врвен приоритет.
Новата партија ќе воведе демократски новитети карактеристични за европските држави, како што е системот на копретседателство. „Јас и Билал Касами ќе бидеме копретседатели, генерален секретар Беким Сали, и потпретседатели Беким Ќоку и Мимоза Муса“, откри Меџити, додавајќи дека во поширокото претседателство ќе бидат вклучени и сите министри, градоначалници, пратеници и заменици министри. Тој предвидува дека во иднина во албанскиот политички блок главни чинители ќе бидат само ВЛЕН и ДУИ, додека помалите партии ќе мора да се претопат во едните или во другите.
Запрашан за најавената реконструкција на владиниот кабинет, Меџити потврди дека начелно се договорени со премиерот Христијан Мицкоски за промени во Владата, но деталите ќе се договараат по завршувањето на партискиот конгрес.. При евалуацијата, најважни ќе бидат резултатите и остварувањата на функционерите.
Во однос на Арбен Фетаи и неговото евентуално заминување од владата за позицијата специјален претставник во Брисел, Меџити истакна дека нема против таква одлука. „Има голем придонес значи кога имаше обид да се дестабилизира владата и ВЛЕН… има вредности, може да придонесе за државата“, рече Меџити. За статусот на министерот за здравство, Азир Алиу, тој посочи дека информациите засега се само на ниво на шпекулации и дека ресорите дополнително ќе се утврдуваат.
Говорејќи за евроинтеграциите, Меџити ја критикуваше претходната власт на СДСМ и ДУИ, обвинувајќи ги дека со години не направиле „милиметар“ раздвижување на процесот. Тој изрази надеж дека од новата влада во Бугарија ќе пристигнат позитивни сигнали за надминување на билатералниот проблем.
Меџити не се согласува со тезата дека државата треба да чека со децении за влез во ЕУ и нагласува дека мора да се фати чекор со регионот. „По секоја цена да најдеме решение и да чекориме кон Европска Унија бидејќи тоа е единствена перспектива за граѓаните… Јас сум оптимист дека ќе фатиме чекор заедно со Албанија, Црна Гора ќе се приклучиме и ќе бидеме членки на Европска Унија“, категоричен е лидерот од ВРЕДИ.
Во однос на актуелните законски измени за укинување на техничката (Пржинска) влада, Меџити даде целосна поддршка, истакнувајќи дека тој модел бил донесен за надминување на политичка криза во времето на владеењето на Никола Груевски и дека сега државата е вратена во нормала.
„Македонија е вратена во нормала и нема потреба од експериментирање и од такви модели кои беа за ненормални услови… Ова е битно и за државата и за бизнисот бидејќи кога воведуваме такви мерки како Пржинска влада, тоа е порака, сигнал до надворешните и внатрешните инвеститори дека тука не е стабилно“, заклучи Меџити, потсетувајќи дека последните неколку изборни циклуси биле оценети како најдемократски од страна на меѓународниот фактор. Воедно, тој ги обвини ДУИ за политичко лицемерие, бидејќи во 2023 година и самите барале укинување на овој модел.
