Првиот вицепремиер и министер за животна средина и просторно планирање, Изет Меџити, денеска најави дека со голема веројатност ќе биде кандидат на коалицијата ВРЕДИ за градоначалник на општина Чаир на претстојните локални избори.
Одговарајќи на новинарско прашање за време на настанот за потпишување договор за набавка на опрема за управување со отпад за 18 општини од Југозападниот и Пелагонискиот регион, Меџити кусо одговори: „Најверојатно да.“
Тој додаде дека консултациите за кандидатите се при крај, и дека коалицијата ВЛЕН, чии дел е и ВРЕДИ, ги очекува финалните резултати од анкетите, по што ќе објави целосна листа на кандидати – од Струга до Липково.
„Ги чекаме резултатите од анкетите бидејќи сакаме да ги избереме најдобрите, најпрофесионалните, да го дадеме најдоброто решение за секоја општина. Не сакаме само победници на избори, туку и најуспешни во реализација на проекти. До крајот на неделата ќе ги објавиме кандидатите од целата коалиција“, рече Меџити.
ИЗВОР: ТВ 21
