Скопје, 15 август 2025 Првиот вицепремиер и министер за животна средина и просторно планирање, г. Изет Меџити, оствари работна посета на Централната лабораторија на Министерствотоза животна средина, каде што ги претстави најновите достигнувања во следењето на животната средина во земјава.
Министерот информираше дека лабораторијата успешно го заврши процесот на реакредитација и обезбеди нов четиригодишен сертификат кој опфаќа 20 аналитички методи, вклучително и мерење на амбиентална бучава и анализа на индустриски и површински води.
‘Во рамки на проектот „EU for Clean Air“, лабораторијата доби модерна опрема ICP-MS во вредност од 160.000 евра, донација од УНОПС, која овозможува прецизно мерење на тешки метали во почвата, водата и воздухот’, изјави Меџити.
Меџити најави дека инсталирањето на опремата и обуката на персоналот ќе се реализираат во септември, оценувајќи го ова како значаен чекор за зајакнување на техничките и научни капацитети и унапредување на квалитетот на еколошките податоци.
Централната лабораторија на Министерството за животна средина претставува клучна алка во системот за заштита и управување со животната средина во земјата и служи како техничка и научна институција за спроведување на законските и стратешките задачи за следење на загадувањето и заштита на компонентите на животната средина.
