реклама
Министерот за здравство Фатмир Меџити тврди дека додека не се расчисти целиот случај, нема да биде исплатен ниту денар за трите модуларни амбуланти во склоп на Здравствениот дом Скопје, а доколку има вакво нешто, како што вели, ќе си поднесе оставка.
– Не е исплатен ниту денар. Доколку за овие три амбуланти е исплатен само денар, јас како министер за здравство ќе си поднесам оставка сега. Не е платено, ниту ќе се плати во иднина додека не се расчисти целиот случај, рече Меџити на денешниот брифинг со новинарите.
реклама
Модуларните амбуланти во Бутел, Лисиче и Ѓорче Петров станаа актуелни по објавата на истражувачката сторија на ИРЛ за модуларната болница во Тетово. За овие три амбуланти, засега останува отворено прашањето дали Владата ќе и го исплати долгот на компанијата „Брако“.
Со оние кои што пласираат дезинформации во медиумите, како што рече, ќе го решава проблемот по правен пат.
реклама
– Целта ми беше да не го оштетиме буџетот на Министерството за здравство. Со непостапување, каматите за три модуларни амбуланти се над 250 илјади евра. Ова значи дека се намалува буџетот на Министерството за лекување на пациентите. Затоа баравме од надлежните институции да имаме информација. Се што не е во ред, имаме поднесено пријави, рече Меџити.
Модуларните амбуланти во рамки на Здравствниот дом Скопје, како што посочи, се безбедни и за медицинскиот и за немедицинскиот персонал.
реклама
– Работата во нив продолжува. Овие амбуланти не се оние поставени за време на Ковид-19, подвлече Меџити.
На новинарско прашање зошто екипа на Брза помош не постапила професионално и пиела кафе додека, како што беше посочено, пациент со кислородна маска бил во возилото, Меџити рече дека доколку се потврди информацијата како точна, тогаш ќе следуваат најригорозни казни за сторителите.
реклама
