Увидот на место на настан каде имало пожар е најкомплексен увид, бидејќи материјалните траги горат. Ова во разговор за ТВ21 го вели професорката по криминалистика Марина Малиш Садовска.
Според неа МВР постапувало професионално и за краток рок ги презело сите мерки во делот на криминалистичката истрага.
„Тоа укажува дека имаме едно строго професионално постапување, не гледам некој исклучок. Тоа што во моментот не е во притвор градоначалникот, би го толкувала само на начин дека што можеби во процедурата немало основи за негово понатамошно задржување. Тоа што одредени лица се приведени, тоа не значи дека кон нив ќе биде процесирана кривична пријава. Значи да оставиме простор на криминалистичко- оперативна дејност да постапи и да добиеме еден целосен увид во настаните“, порача Марина Малиш Саздовска.
Таа апелира надлежните да постапуваат многу внимателно, бидејќи граѓаните може лесно да бидат изманипулирани за време на вакви големи трагедии. Саздовска не очекува ескалации на состојбата.
„Масата која што ќе биде вклучена во голем број, тоа ќе бидат голем број на учесници на погребалните поворки, лесно би можело да биде изманипулирана. Да се надеваме дека тоа нема да се случи. Меѓутоа секако во тие траорни моменти луѓето се многу емотивно насочен во делот на самата ситуација. Би требало со многу големо внимание да се постапува во тие ситуации. Да се избегнат сите можни провокации од било која страна“, вели Марина Малиш Саздовска.
Според Саздовска, Разузнавачките служби имаат искуство и доколку има одредени групи кои што би биле радикални и би преземале одредени екстремни чекори, Службите би требало да имаат информации и благовремено да се постават.
Саздовска очекува дека ова ќе биде една пресвртница во сузбивањето на криминалот во нашата држава.
ИЗВОР: ТВ 21
