Маск ја врати титулата на најбогат човек на светот неколку часа откако го лансираше ребрендингот на Твитер

Неколку часа пред да се врати на првото место на листата на милијардери, тој го објави ребрендирањето на Твитер, заменувајќи ја познатата сина птица со ново лого „Х“

Илон Маск ја врати титулата на најбогат човек на светот само неколку часа откако го лансираше новиот ребрендинг на Твитер, со кој култната сина птица од логото ја замени со „Икс“ (Х).

На 24 јули „Форбс“ објави дека Маск е повторно на првото место на листата на милијардери, со проценка дека неговото нето богатство во понеделникот се зголемило за уште 4,1 милијарди долари, достигнувајќи вкупно нето богатство од 240,7 милијарди долари.

„Зголемувањето на вредноста доаѓа откако акциите на Тесла се искачија за повеќе од 2,5 отсто во понеделникот наутро“,

се наведува во објавата на „Форбс“.

Маск накратко се спушти од првото место на листата во петокот, откако акциите на Тесла паднаа за речиси 10 отсто, што предизвика неговата нето вредност да се намали за 18 милијарди долари.

• Познатата сина птица „одлета“ од Твитер, Маск го претстави новото лого

Неколку часа пред да се врати на првото место на листата на милијардери, тој го објави ребрендирањето на Твитер, заменувајќи ја познатата сина птица со ново лого X. Извршната директорка на Твитер, Линда Јакарино, најави дека промената на логото е дел од планот на компанијата да трасформира „сè“ на апликацијата.

Интернет-адресата на социјалната мрежа сè уште е twitter.com, но наскоро треба да се смени во x.com. Објавите на социјалната мрежа, пак, наместо „твитови“, сега ќе се нарекуваат „иксови“.