МАРИБОР (АА) – Кривулестите улици, плоштади и историски објекти во Марибор, Словенија, го носат секој гостин низ некои минати времиња, кога Главниот плоштад и неговата околина беа средиште на преполни трговски работилници и места каде што селаните и трговците ги продаваа своите производи и стоки, пишува Анадолу.
Сместен во покраината Штаерска во североисточниот дел на Словенија, вториот по големина град во оваа земја е место каде што се спојуваат историското и модерното, а во летните денови е место посетувано од голем број посетители од повеќето европски земји.
Екипата на Агенција Анадолу забележа интересни кадри од мариборските улици и плоштади.
Додека најмладите бараат освежување во фонтаните на плоштадите во Марибор, повозрасните го посетуваат Главниот плоштад, кој изобилува со историски знаменитости како Градското собрание, Фрањевачкиот манастир и црква, Кружниот столб, кој жителите на Марибор го изградиле во XVII век во знак на сеќавање на чумата што ја преживеале, и голем број други споменици од богатата култура и историја на овој град.
Главниот плоштад е место каде туристите имаат можност да ги посетат живописните мали работилници, а се наоѓа во близина на Стариот мост, на реката Драва, кој важи за еден од симболите на овој град со приближно 97 илјади жители.
Целокупниот амбиент на градските улици го заокружуваат уличните музичари, кои велат и дење и ноќе нудат забава за себе и за другите преку нотите на композициите од просторот на поранешна Југославија.
Историските записи велат дека градот претрпел одредени промени во 20. век, но основното старо градско јадро останало во голема мера сочувано.
