Ministri i Mbrojtjes i Kosovës, Ejup Maqedonci, ka mbajtur një fjalim në Tiranë me rastin e shfaqjes së dokumentarit “Në Shërbim të Betimit”, kushtuar komandantit Adem Shehu dhe kontributit të tij në luftën për lirinë e Kosovës.
Maqedonci ka thënë se për të ishte një nder i veçantë të merrte pjesë në shfaqjen e dokumentarit, duke e cilësuar atë si një rrëfim jo vetëm për një ushtarak dhe komandant, por edhe për një periudhë të rëndësishme të angazhimit për çlirimin e Kosovës.
Sipas tij, angazhimi i Adem Shehut për Kosovën kishte nisur para përfshirjes së tij në përgatitjen e vullnetarëve të UÇK-së. Maqedonci ka përmendur takimet e Shehut me heroin Agron Rrahmani dhe veprimtarin e çështjes kombëtare e eprorin e UÇK-së, Fatmir Humolli, gjatë vitit 1997.
Postim i plotë:
Fjalimi im me rastin e shfaqjes në Tiranë të dokumentarit “Në Shërbim të Betimit”, kushtuar komandantit Adem Shehi, në shenjë respekti dhe mirënjohjeje për kontributin e tij në luftën për lirinë e Kosovës.
Të nderuar të pranishëm,
Të nderuar autorë dhe realizues të dokumentarit,
Të dashur bashkëluftëtarë dhe miq,
Është nder i veçantë të jem sot në Tiranë, në shfaqjen e dokumentarit “Në Shërbim të Betimit”, kushtuar komandantit Adem Shehu. Ky dokumentar sjell para nesh jo vetëm rrëfimin e një ushtaraku dhe komandanti, por edhe historinë e një vendimi të guximshëm dhe të një përkushtimi të jashtëzakonshëm ndaj lirisë së Kosovës.
Angazhimi i Adem Shehut për çlirimin e Kosovës kishte nisur para se ai të përfshihej në përgatitjen e vullnetarëve të UÇK-së. Në vitin 1997, ai u njoh me heroin Agron Rrahmani dhe me veprimtarin e çështjes kombëtare e eprorin e UÇK-së, Fatmir Humolli. Këto takime i paraprinë një periudhe angazhimi intensiv për përgatitjen e vullnetarëve që vinin nga Kosova dhe nga vise të ndryshme shqiptare.
Ky angazhim ishte pjesë e një përpjekjeje më të gjerë kombëtare. Në luftën për lirinë e Kosovës u bashkuan shqiptarë nga të gjitha trevat, ndërsa shumë vullnetarë gjetën në Shqipëri hapësirë për mbështetje dhe përgatitje. Ky bashkim dëshmoi se çështja e Kosovës ishte çështje e mbarë kombit shqiptar dhe se liria e saj përbënte një synim të përbashkët.
Në mesin e marsit të vitit 1998, këtu në Tiranë, mora nga Adem Shehu mësimet e para ushtarake. Për mua, ky është një kujtim i veçantë dhe pikënisja e rrugës sime ushtarake.
Gjatë luftës, në periudhën kur unë komandoja Batalionin e Parë të Brigadës 153 “Hyzri Talla”, Adem Shehu ishte komandant i kësaj brigade. Në atë periudhë pata mundësinë ta njihja nga afër si komandant dhe të shihja disiplinën, përkushtimin dhe ndjenjën e përgjegjësisë me të cilat e kreu detyrën.
Si Ministër i Mbrojtjes dhe si bashkëluftëtar i tij, e vlerësoj lart kontributin e Adem Shehut në UÇK dhe në luftën për lirinë e Kosovës. Nderimi i tij nga Presidentja e Republikës së Kosovës me “Urdhrin e Lirisë”, këtë qershor, me rastin e Ditës së Çlirimit të Kosovës, është vlerësim i merituar për shërbimin dhe sakrificën e tij.
Falënderoj të gjithë ata që punuan për realizimin e këtij dokumentari. Dokumentimi i historisë sonë është përgjegjësi ndaj atyre që luftuan dhe ndaj brezave që vijnë. Përmes këtij filmi, kujtojmë rrugëtimin e Adem Shehut dhe vlerat që e udhëhoqën: besnikërinë ndaj betimit, guximin dhe sakrificën për liri. Kujtojmë gjithashtu përpjekjen e përbashkët të shqiptarëve nga të gjitha trevat, të cilët u bashkuan rreth këtij qëllimi.
Komandant, ju shpreh respektin dhe mirënjohjen time të thellë.
Faleminderit
Burimi: botasot
