ПАРИЗ (АА) – Претседателот на Франција, Емануел Макрон, ја одложи државната посета на Германија, планирана за периодот од 2 до 4 јули, поради немирите во неговата земја предизвикани од полициското убиство на 17-годишно момче, пренесува Анадолу.
„Макрон денес телефонски разговараше со германскиот претседател Франк-Валтер Штајнмајер и го извести за ситуацијата“, соопшти портпаролот на претседателот на Германија.
„Претседателот Макрон побара одложување на планираната државна посета на Германија“, рече портпаролот.
Четвртата ноќ од протестите, кои избија поради полициското убиство на 17-годишно момче во Франција, приведени се повеќе од 1.300 лица, а во судирите меѓу двете страни повредени се 79 припадници на безбедносните сили.
Низ Франција и синоќа се одржуваа масовни протести поради неодамнешното убиство на малолетниот Нахел М.
Демонстрантите во текот на ноќта запалија 1.350 автомобили на улиците на градовите, а материјална штета е нанесена и на 234 згради. Подметнат е пожар на 2.560 локации на јавни површини, а нападнати се најмалку 30 полициски станици и 11 станици на жандармеријата.
Полицијата на 27 јуни отвори оган кон автомобил во кој имало три лица, убивајќи го 17-годишниот возач кој не ја испочитувал наредбата да запре.
Истрагата за инцидентот е во тек, но овој настан предизвика масовни протести на улиците на градовите низ Франција.
Обвинителството на Франција објави дека полицаецот кој го убил тинејџерот е обвинет за убиство со намера и сместен е во истражен затвор.
Извор: www.aa.com.tr
