Косовскиот премиер Албин Курти денеска во Берлин изјави дека целта на Косово е членство во меѓународните организации, ЕУ и НАТО.
Тој при посетата на „Фондацијата Бертелсман“ рече дека целта е да се подобрат односите на Косово со Германија и европските демократски држави.
Курти, потсетувајќи на историјата на 90-тите години на минатиот век и на патот на многу земји кон евроатлантските интеграции и проширувањето на ЕУ, НАТО и Советот на Европа (СЕ), подвлече дека целта на Косово е членство во овие организации.
Тој укажа и на историската важност и „динамиката на односите“ на Косово со Германија и европските демократски држави.
„Првиот чекор го направивме во 2008 година, кога Косово прогласи независност и кога бевме признати од мнозинството демократии во Европа“, рече тој. Како што рече, „вториот чекор се однесува на обединување со институциите кои се столбови на демократска Европа“.
– Сакаме да се приклучиме на НАТО како безбедносен чадор за нашиот континент. Сакаме да се приклучиме на ЕУ како најважен проект и процес на мир и просперитет, потенцираше премиерот на Косово.
Тој ја нагласи важноста на членството на Косово во Советот на ЕУ.
– Првиот чекор што треба да го направиме сега е да се приклучиме на првиот клуб на европските демократии, создаден токму овој месец пред 75 години во Лондон – Советот на Европа, рече Курти.
Тој додаде дека Владата на Косово е посветена на почитување на заедничките вредности, човековите права, владеењето на правото и демократијата.
Курти ги повика германските власти да продолжат да го поддржуваат Косово во последната фаза од гласањето и постигнувањето полноправно членство во таа организација, соопшти Владата на Косово.
Тој рече дека прифаќањето на Косово како 47-ма членка на Советот на Европа на неговата 75-годишнина е „историски напредок, за Косово и неговите граѓани, за регионот и за целиот Совет“. Како што наведе, корист од тоа ќе имаат сите граѓани, особено малцинствата во Косово.
Извор: kurir.mk
