Владата на Косово јавно ја покажува својата подготвеност да придонесе за деескалација на ситуацијата и да не презема чекори кои би можеле да ја ескалираат ситуацијата на северот на земјата. Тоа значи и итно намалување на четвртина од полицајците кои се внатре во зградите или во нивна близина, изјави денеска косовскиот премиер
Тој, исто така, додаде дека поддржува одржување нови избори во четирите северни општини, но според важечката законска регулатива и откако ќе заврши летото
Според договорот од понеделникот во Братислава, 25 отсто од полицајците во и околу општинските објекти на северот ќе бидат преместени на други места во истите општини каде што е потребно, рече косовскиот премиер Албин Курти во своето обраќање пред седницата на владата на Косово. Ваквата одлука следува бидејќи, како што нагласи, во последните две недели ситуацијата во општина Звечан, Зубин Поток и Лепосавиќ е многу помирна.
„Владата на Косово јавно ја покажува својата подготвеност да придонесе за деескалација на ситуацијата и да не презема чекори кои би можеле да ја ескалираат ситуацијата на северот на земјата. Тоа значи и итно намалување на четвртина од полицајците кои се внатре во зградите или во нивна близина. Така, 25 отсто од полициското присуство ќе биде преместено на други места во истите општини и ќе продолжи со својата работа таму каде што има поголема потреба од нив бидејќи сметаме дека состојбата во близина на општинските згради е релативно помирна веќе две недели. Второ, косовската полиција, заедно со ЕУЛЕКС и КФОР, ќе ја процени безбедносната ситуација по потреба, особено за да ја разгледа можноста за дополнително намалување на полициското присуство во и околу општинските згради. Ова беше наше барање од почетокот бидејќи владеењето на правото и мирот и безбедноста ги гледаме како заеднички интерес на сите страни“,
рече Курти.
Тој, исто така, додаде дека поддржува одржување нови избори во четирите северни општини, но според важечката законска регулатива и по летната сезона.
„Владата на Косово преку соопштение во јавноста дава поддршка за одржување на предвремени избори во четирите општини на северот од државата и тоа по летната сезона и со целосно почитување на законската рамка. Во овој случај, ние се залагаме да ја обезбедиме потребната правна основа за да овозможиме организирање на овие избори. За нас продолжува да биде важно граѓаните да имаат локална застапеност. Но, за да се постигне ова, мора да се создаде средина која овозможува вистинска кампања, политички плурализам, учество на локалните заедници и која гарантира неповредливост на гласот. Во овој контекст треба да се сфати важноста што владата му ја дава на владеењето на правото во секој дел од државата. Не можеме да правиме компромиси со владеењето на правото бидејќи тоа би ја поткопало демократијата. Четвртата се однесува на поканата што ЕУ ќе ја испрати до двајцата главни преговарачи. Тие ќе бидат поканети во Брисел со цел да се финализира планот за секвенционирање, односно табелата за имплементација на Договорот за нормализација, по што ќе започне имплементацијата на сите членови од договорот“,
вели Курти.
Покрај овие, Курти ја истакна потребата од отстранување на мерките на ЕУ против Косово бидејќи, според него, двете страни треба да преговараат врз основа на еднакви позиции.
Тој, исто така, нагласи дека за успешно спроведување на основниот договор меѓу Косово и Србија двете страни мора јавно да признаат дека договорот е правно обврзувачки.
Извор: 360stepeni.mk
