Премиерот, посочувајќи на изјавата на францускиот претседател Емануел Макрон за „Европа со повеќе брзини“, нагласи дека „тоа значи дека оние кои се побрзи во своите реформи, тие први ќе влезат во 2030 година во Европската Унија“
Претседателот на Европскиот совет, Шарл Мишел, на два пати повтори дека има кокретна одредница за проширувањето на ЕУ – 2030 година, и дека оние што се побрзи во своите реформи, први ќе влезат во 2030 година во Европската Унија, истакна вечерва премиерот Димитар Ковачевски на почетокот на трибината на тема „ЕУ за македонската економија“ со која денеска во Скопје започна владината кампања „Ние сме Европа“.
„Сакам на почетокот да расчистиме три дилеми: Прво дека после долго време претседателот на Европскиот совет во Блед и повторно на телевизија Словенија кажа дека има конкретна одредница за проширување на Европската Унија, а тоа е 2030 година и тоа е истата година за којашто ние велиме дека Северна Македонија ќе биде подготвена“,
рече Ковачевски.
Премиерот, посочувајќи на изјавата на францускиот претседател Емануел Макрон за „Европа со повеќе брзини“, нагласи дека „тоа значи дека оние кои се побрзи во своите реформи, тие први ќе влезат во 2030 година во Европската Унија“.
„Исто така, оттука сакам да ги демантирам пропагандистите платени од трети држави кои не сакаат да ја видат оваа држава во ЕУ, да ги демантирам структурите на поранешните служби на државна безбедност уште од времето на Југославија, кои исто така не сакаат да ја видат оваа држава во ЕУ и оние чиишто бизнисни сметаат дека единствено можат да работат во изолирана држава, претседателот Макрон кажа да, Европа со повеќе брзини, но тоа значи дека оние кои се побрзи во своите реформи, тие први ќе влезат во 2030 година во Европската Унија,
посочи Ковачевски.
Тој рече дека сите стратешки одлуки што ги носи оваа Влада и што ќе ги носи, имаат стратешка цел, а тоа е развој на економијата, развој на приватниот сектор, нови вработувања и подобро платени работни места.
Со трибината, која се одржува во центарот на Скопје, на тема „ЕУ за македонската економија“, во Скопје денеска започна кампањата „Ние сме Европа“. Настанот е дел од информативниот караван под мотото „Саем на европски вредности“, а во рамките на караванот ќе се презентираат можностите и придобивките од преговорите кои ги нуди членството во ЕУ.
Вечерва свои обраќања ќе имаат и вицепремиерот за европски прашања Бојан Маричиќ, министерот за економија Крешник Бектеши, шпанскиот амабасадор и други. На настанот присуствуваат голем дел од министрите во Владата, поранешниот премиер Владо Бучковски, како и повеќе граѓани.
Кампањата „Ние сме Европа“ ќе се реализира во осум градови низ државата – Скопје, Битола, Куманово, Охрид, Прилеп, Струмица, Тетово и во Штип. Темите што ќе бидат опфатени се економија, култура, енергетика, туризам, земјоделие, млади, инфраструктура и социјална политика.
ИЗВОР: 360stepeni.mk
