Градоначалникот на Општина Бутел, Дарко Костовски, воедно и кандидат на ВМРО-ДПМНЕ за втор мандат, соопшти дека започнува новата фаза од градежната офанзива во оваа општина. Тој истакна дека само во Љуботен ќе бидат реконструирани и асфалтирани повеќе од десет улици, меѓу кои и двете главни улици на ова населено место.
„Процесот на реконструкција се одвива со силна динамика и наскоро ќе продолжиме и во другите населени места опфатени со овој голем проект. Нашата цел е рамномерен развој на секој дел од општината,“ напиша Костовски во својот статус на фејсбук.
Актуелниот градоначалник на Бутел ја ужива поддршката и од албанските жители на оваа општина, кои нагласуваат дека за првпат еден градоначалник сериозно се ангажирал за развој без етнички разлики и за рамномерни инвестиции во сите маала и населени места.
Според Костовски, градежната офанзива ќе продолжи и во наредните месеци, опфаќајќи ја патната инфраструктура на целата територија на Бутел.
