Општина Бутел влегува во нова ера на здравството! Градоначалникот на Општина Бутел и истовремено кандидат на ВМРО-ДПМНЕ за втор мандат, Дарко Костовски, во видео изјава го претстави 3D проектот за изградба на новата модерна поликлиника, која ја оцени како „гордост за граѓаните на Бутел“.
„Градиме убав, функционален и модерен објект, кој ќе им овозможи на граѓаните достојни услови за квалитетна здравствена заштита. Ова е историски чекор за нашата општина,“ изјави Костовски.
Новата поликлиника ќе се простира на површина од 1.500 квадратни метри, ќе има приземје и прв кат, а ќе нуди услуги од општа медицина, педијатрија, гинекологија, интерна медицина и невропсихијатрија, како и од физикална медицина.
Според Костовски, новата поликлиника во Бутел ќе располага со најсовремена опрема, со РТГ кабинет, лабораторија, ехо и аптека, пункт за итна медицинска помош и ноќна служба за граѓаните. Изградбата на овој здравствен објект ќе се реализира на просторот каде што моментално се наоѓа старата амбуланта, согласно урбанистичкиот план усвоен на 16 февруари 2024 година.
Овој проект, изработен од самата Општина Бутел, се гледа како една од најзначајните инвестиции во локалната здравствена инфраструктура. Со тоа, граѓаните на Бутел ќе добијат современи и блиски услуги, без потреба да патуваат во други општини.
