„По експресното задушување на ‘востанието’ на ДУИ, Али, оџата со желба да стане политичар, Фуки, криминалците што чекаат да градат згради во Бутел и некои други структури, ДУИ од отворен шовинизам премина во екстремно евтини лаги, кои следниот пат на локални избори ќе ги доведат до уште поостро задушување на криминалното ‘востание’.“ напиша денес на својата официјална фејсбук-страница градоначалникот на Општина Бутел, Дарко Костовски, реагирајќи остро на обвинувањата на ДУИ дека наводно Денот на Албанската Азбука не бил одбележан во основните училишта каде што учат албански ученици.
Костовски ја обвини ДУИ дека по „пропаѓањето на лажното политичко востание“, се обидува да создаде непостоечки скандали преку портали, користејќи, како што рече тој, „шовинизам, лаги и криминална нарација за да го нападнат развојот на Бутел“.
Според Костовски, проектите и динамиката на работите во Општина Бутел не можат да се прикријат со никакви манипулации или клевети.
„Неспособноста, криминалните тенденции и шовинизмот отсекогаш се бранеле со отворени лаги,“ напиша понатаму Костовски, најавувајќи дека следниот изборен резултат ќе биде уште поостар за политичките противници.
На крај, градоначалникот на Бутел, Дарко Костовски, им апелираше на граѓаните да не наседнуваат на дезинформации, додавајќи: „Бутел знае.“
