Градоначалникот на Битола, Тони Коњановски, присуствуваше на завршниот настан на проектот „Земјоделство безбедно од пожари во Општина Новаци“, спроведуван од здружението Центар за ресурси во животната средина.
На настанот беа презентирани активностите и резултатите од проектот, кој има за цел промовирање и воспоставување на земјоделски практики што ќе го намалат ризикот од пожари, количината на запалливи материјали, како и штетите предизвикани од земјоделски и шумски пожари во регионот.
Проектот, како што беше истакнато, придонесува кон побрзо и поефикасно интегрирање на практики за справување со пожари на ниво на предел, преку размена на искуства, добри практики и информирање за ризиците и опасностите.
Во своето обраќање, Коњановски нагласи дека иако проектот се реализира во Општина Новаци, неговите пораки и ефекти се значајни и за останатите општини во Пелагонискиот регион, вклучително и Битола, каде исто така постојат земјоделски површини.
Тој се осврна и на изградбата на новата противпожарна зграда, истакнувајќи дека станува збор за капитален проект кој ќе придонесе за подобри услови за работа и поголема ефикасност на противпожарната единица, која ги покрива општините Битола, Новаци и Могила.
Новата противпожарна зграда е изградена со средства од Општина Битола, додека нејзиното опремување ќе биде обезбедено со поддршка од Министерството за одбрана на САД.
