Во организација на Јавното претпријатие Индустриска зона „Жабени“, денеска во Битола се одржа работен состанок на тема „Инвестирај во твојата иднина“, на кој присуствуваа владини претставници и стопанственици, со цел размена на идеи и иницијативи за економски напредок на регионот.
Градоначалникот на Општина Битола, Тони Коњановски, во своето обраќање истакна дека и Владата и локалната самоуправа активно создаваат услови за нови инвестиции и реализација на проекти кои ќе придонесат за подобар живот на граѓаните и развој на целиот пелагониски регион.
Тој нагласи дека клучните области во кои се очекува зголемување на инвестициите се економскиот развој, патната инфраструктура, животната средина, урбанизмот, спортот, младите, културата и културниот туризам.
„Патната и железничката инфраструктура се многу важни за инвеститорите, а со тоа и за инвестициите кои тука се вложуваат или ќе се вложуваат во иднина“, посочи Коњановски.
Како еден од најзначајните проекти за регионот, тој ја издвои изградбата на автопатот Прилеп – Битола, како и останатите патни делници кои ќе овозможат побрзо и помодерно поврзување со главниот град.
Коњановски се осврна и на железничката инфраструктура, нагласувајќи дека железничката линија до индустриската зона „Жабени“, односно до границата со Грција, веќе е реконструирана, а се работи и на финализирање на проектот од грчка страна.
Според него, со комплетирањето на железничкото поврзување, Битола директно ќе се поврзе со Солунското пристаниште, што ќе претставува значителен поттик за економијата, транспортот и новите инвестиции во регионот.
