Тече жалбената постапка за новоосомничените за трагедијата во Кочани, за кои Кочанскиот суд им одреди притвори и мерки на претпазливост. Од судот соопштија дека до нив се поднесени 6 жалби за определување мерки за обезбедување.
Во зависност од делата за кои се товарат, за 24 односно 72 часа – заклучно од вчера ќе заврши рокот за жалба. Меѓи поднесените жалби е и таа за Министерот без ресор и поранешен директор на Дирекцијата за заштита и спасување Шабан Сали – за кој судија на претходна постапка одреди ефективен притвор.
Во земјава денеска се врати и актуелниот македонски амбасадор во Норвешка, кој се товари за пропусти додека раководел со Министерството за економија. Од обвинителството денеска посочија дека за него се бараат мерки за обезбедување на присуство, додека се води постапката. Тој е последниот 19-ти осомничен во проширената истрага.
„Основното јавно обвинителство Кочани денеска до Основниот суд во Кочани достави предлог за определување мерки за претпазливост за последниот 19-ти осомничен на кого беше проширена истрагата за пожарот во кочанската дискотека ‘Пулс’“, вели Обвинителството.
Во меѓувреме министерот Тошковски изјави дека никој нема да биде поштеден во истрагата, вклучувајќи го и неговото министерство.Веќе има осомничени полициски службеници, но можно е истрагата да продолжи и за други вработени во министерството, дополни Тошковски.
Во новите осомничени за трагедијата во Кочани, се актуелниот директор на Дирекцијата за заштита и спасување Џеват Селами како и поранешнио Аднан Џафероски. Осомничени се и претходниците на Крешник Бектеши, поранешните министри за економија Ваљон Сарачини, Беким Незири и Дритон Кучи.
Во истрагата се најдоа 2 државни секретари и тројца службени лица во Министерството за економија како и 6 инспектори од пазарниот и градежниот инспекторат. Тим од 13 обвинители ја водат истрагата, со која се сослушани над 300 сведоци. Обвинителството најпрвин поведе постапка против 27 физички и три правни лица за тешки дела против општата сигурност.
Со новата истрага и таа на обвинителството за организиран криминал со која беа опфатени седум полициски службеници во истрагата за трагедијата во Кочани се опфатени 52 физички и три правни лица. 31 од нив се во ефективен притвор – за четворица се чека да заврши жалбената постапка.
Извор: 24vesti.mk
