Универзитетската клиника за урологија во Скопје даде пример за тоа како бенефициите можат да се претворат во вистинска добробит за пациентите. Наместо да ги искористат субвенциите од околу 500.000 денари за купување нови службени мобилни телефони, вработените одлучија средствата да ги пренаменат за 18 клима-уреди и две машини за перење алишта.
Директорот на Клиниката, д-р Башким Шабани, изјави дека одлуката била донесена поради големата потреба од климатизација на болничките соби, особено во летните месеци кога температурите достигнуваат и над 40 степени Целзиусови. „Сите соби сега се климатизирани, пациентите се чувствуваат пријатно, а машините за перење значително го олеснија одржувањето на хигиената“, истакна Шабани.
Претседателот на Управниот одбор, Огнен Ивановски, додаде дека се работи за нов пристап во менаџирањето на здравствена установа. „Наместо нови телефони и привилегии за раководниот кадар, решивме средствата да ги вложиме во услови што директно им користат на пациентите“, рече тој, појаснувајќи дека ваквиот модел може да се примени и на други клиники.
Главната медицинска сестра, Виолета Стојановска, нагласи дека одлуката била донесена едногласно. „Пациентите се на прво место. Еден мобилен телефон и по две години е функционален, но клима-уредот и подобрената опрема имаат далеку поголемо влијание врз квалитетот на грижата“, рече таа.
Од Клиниката потсетуваат дека во последните години реализирале бројни донации и инфраструктурни подобрувања, вклучувајќи нови кревети, медицинска опрема, прочистувачи на воздух и современ апарат за биопсија на простата вреден 200.000 евра.
Со ваквиот потег, Универзитетската клиника за урологија испраќа порака до сите здравствени установи дека вистинските приоритети секогаш треба да бидат условите и грижата за пациентите, а не привилегиите за вработените.
ИЗВОР: racin.mk
