Хари Кејн верува дека сега ги има најдобрите шанси во кариерата да ја освои „Златната топка“, откако зад себе остави сезона во која постигна неверојатни 73 гола.
Напаѓачот на Баерн Минхен е меѓу 30-те номинирани за наградата за 2026 година, а победникот ќе биде прогласен на 26 октомври во Лондон.
„Сега, веројатно, ги имам најдобрите шанси. Дали ќе биде така и во иднина, ќе видиме. Отворено кажав дека минатата година беше најдобра за мене на личен план, но и од аспект на тимските достигнувања. Би бил неверојатно горд ако ја освојам наградата“, изјави Кејн.
Англичанецот во сезоната 2025/26 постигна 73 гола на 65 натпревари, што е втор најдобар учинок во една сезона во историјата, зад рекордот на Лионел Меси.
Кејн воедно беше најдобар стрелец во Бундеслигата со 36 гола, а неговата продукција беше еден од главните адути во аргументите дека треба да биде сериозен кандидат за најпрестижната индивидуална награда.
„На крајот, сè зависи од другите луѓе и нивното мислење“, додаде Кејн, кој сè уште ја чека првата „Златна топка“ во својата кариера.
Извор: sportmanija.mk
