Ќе има ли директни преговори Путин – Зеленски на 15 Мај во Истанбул? Откако рускиот претседател Путин предложи, украинскиот претседател Зеленски прифати да разговара очи во очи со рускиот лидер.
Нејасни се условите на ЕУ и Украина за претходен прекин на огнот, а европските лидери се заканија и со санкции доколку Москва од денеска не прекине со борбите. Сепак се чини дека прагматичниот став на американскиот претседател Трамп надвладеа и официјален Киев се согласи на безусловни преговори и како што кажа Зеленски, „тој ќе оди во Истанбул без разлика дали ќе се појави Путин“.
– Се надевам дека овој пат Русите нема да бараат причини зошто не можат да дојдат. – Володимир Зеленски, претседател на Украина.
Русија не прифаќа прекин на огнот, бидејќи велат дека Украина ќе го искористи периодот за вооружување и консолидирање на своите позиции. Според Москва првата точка во преговорите треба да биде под кои услови би имало прекин на огнот.
– Треба да водите директни преговори за да најдете начин за прекин на огнот. Едноставен пристап кон прекин на огнот е неприфатлив. – Дмитри Песков, портпарол на Кремљ.
Според американскиот претседател Трамп состанокот ќе разјасни дали страните се подготвени да склучат мировен договор во принцип, а ако не, тогаш „европските лидери и САД ќе знаат како стојат работите и ќе можат да дејствуваат соодветно“. „Почнувам да се сомневам дека Украина ќе склучи договор со Путин, кој е премногу зафатен со прославата на победата во Втората светска војна, која без Соединетите Американски Држави беше невозможно да се добие (дури ни приближно!). Одржете состанок, веднаш!!!“, побара Трамп.
Извор: 24vesti.mk
