ИСТАНБУЛ (АА) – Катар соопшти дека ја испорачал последната серија мобилни куќи подготвени за погодените од земјотресот што на 6 февруари се случи во Туркије и Сирија, јавува Анадолу.
Во соопштението, Катарскиот фонд за развој (QFFD) истакна дека мобилните куќи вчера пристигнале во Хатај, Јужна Туркије.
„Во текот на трите месеци по земјотресот, Катарскиот фонд испорача 10.000 целосно опремени куќи со поставена изолација во над 15 различни градови и населени места низ југоисточна Туркије“, соопштија од Фондот.
Катарскиот фонд за развој „продолжува да ја подобрува егзистенцијата на ранливите заедници низ светот преку обезбедување на потребната помош за спасување животи, давање надеж и унапредување на мирот и правдата преку одржлив и инклузивен развој“, се додава.
По земјотресот Катар вети 10.000 мобилни домови за погодените. Првата серија од 306 целосно опремени домови пристигна во Туркије на 12 февруари.
На 13 јуни катарската Црвена полумесечина започна донаторска кампања за основање на градот Хајат Шехир во Истанбул, за сместување на сирачињата погодени од земјотресите.
Над 50.000 луѓе загинаа во двата силни земјотреса што ја погодија Јужна Туркије на 6 февруари.
Земјотресите со магнитуда од 7,7 и 7,6 степени според Рихтеровата скала со епицентар во Кахраманмараш, погодија над 13 милиони луѓе во 11 турски области.
И неколку земји во регионот, од кои најмногу Сирија и Либан, ги почувствуваа двата силни потреса што се случија во период од помалку од 10 часа.
Извор: www.aa.com.tr
