Францускиот репрезентативец Лука Карабатиќ изрази задоволство од досегашните изданија на „триколорите“ на Светското првенство и во разговор за Gol.mk рече дека последната победа против Холандија од 35-28 била тешко извојувана.
„Лалињата“ не можеа да пружат силен отпор на големиот фаворит, а Карабатиќ скромно изјави дека неговите соиграчи дале максимум, воедно најавувајќи и голема борба на последниот натпревар против Македонија.
„Ниедна победа на Мундијалите не е рутинска, сите натпревари се важни и се обидуваме да го кренеме нашето ниво. Знаеме дека секоја екипа сака да освои бодови против Франција и затоа мораме да одговориме со максимален пристап.
Македонија има многу млада и квалитетна екипа, полна е со енергија и мислам дека ќе имаме тежок натпревар в сабота. Остварија добри резултати и прикажаа одличен ракомет. Тимот многу напредна од минатото Европско првенство, тоа секој љубител на ракометот веднаш тоа го забележува.
Репрезентацијата е предвоена од Кирил Лазаров, играч кој ги освои сите можни трофеи во клупскиот ракомет и настапуваше во најсилните светски лиги. Неговото искуство е од огромно значење и овие момчиња учат од еден неверојатно талентиран ракометар“, рече Карабатиќ.
Франција го задржа максималниот ефект на Мундијалот и е сигурен патник во четвртфиналето, а последниот натпревар од групната фаза против Македонија ќе го одигра на 25 јануари во 20:30 часот.
Извор: kurir.mk
