Победата на Хрватска над Франција во полуфиналето од Светското ракометно првенство е главна тема во регионот. Оваа генерација на Хрватска го одигра најдобриот натпревар и го тресна големиот фаворит и „коцкестите“ по пауза од 16 години одново ќе играат мундијалско финале.
Еден од хероите на средбата во Загреб беше голманот Доминик Кузмановиќ, кој против Франција зад своето име запиша тринаесет одбрани. 23-годишниот чувар на мрежата блеска на овој шампионат, а денеска „Вечерњи лист“ откри негов голем гест кон својата учителка од основно, Сања Ороз.
„Колку прекрасен младич стана овој дечко. Како бивша ракометарка и негова учителка, имавме чести разговори за ракометот, ги водевме на натпреварите. Во осмо одделение го прашав каде ќе се запише, а тој ми одговори во школата во Дуго Село за да може да тренира. Со оглед на тоа што беше супер одличен, го прашав, а што ако не успееш, тој само ми рече ‘ќе успеам’…
Јас на тоа му реков кога ќе стане успешен, да се сети на својата учителка и да ѝ подари една карта. И тука падна договор… од пред 8 години. И во понеделникот ми доаѓа негова порака: ‘Учителке имам карта за Вас ако сакате и ако можете да дојдете’. Баш, баш ме израдува… и така благодарение на него присуствував на ова чудо против Унгарија. Само биди здрав драги Кузма, веќе си голем сега“, напиша учителката на Кузмановиќ.
Во финалето Кузмановиќ и Хрватска ќе се судрат со подобриот од вечерашниот полуфинален натпревар меѓу Данска и Португалија.
Извор: kurir.mk
