Кабинетот на министерот без ресор задолжен за интеграција и имплементација на Стратегијата за инклузија на Ромите 2022–2030, Шабан Салиу, денеска ја започна кампањата „Учам за подобра иднина“.
Како што соопштија од Кабинетот на Салиу, преку оваа иницијатива се испраќа силна порака до младите Роми дека образованието е клучот за успех, достоинствен живот и еднакви можности за секое дете.
Целта на кампањата е да ги охрабри и мотивира младите да го препознаат учењето како најсигурен пат кон подобра иднина.
-Со заеднички сили можеме да создадеме услови во кои секое дете ќе има поддршка да го оствари својот потенцијал. Образованието не е само право, туку и најголема инвестиција во иднината на заедницата и државата, посочуваат од Кабинетот на министерот Салиу.
Министерот ја изразува својата целосна поддршка за оваа иницијатива, нагласувајќи дека вложувањето во младите е врвен приоритет на неговата работа.
Кампањата ќе се реализира во повеќе градови низ државата, а започна денес во Куманово, во основното училиште „Христијан Тодоровски Карпош“. Активностите ќе бидат насочени кон подигање на свеста за важноста на образованието, како и промоција на позитивни примери на успешни млади Роми, додаваат од Кабинетот на министерот Салиу.
Извор: kurir.mk
