Општина Прилеп објави јавен повик за предлагање на кандидати за членови на Локалното собрание на млади, со цел активно вклучување на младите во локалните политики и донесување одлуки што го засегаат животот на младинската популација.
Според објавата, повикот е распишан врз основа на одредби од Статутот на Општина Прилеп и Законот за младинско учество и младински политики. Локалното собрание на млади ќе биде составено од по еден делегат и еден заменик-делегат предложен од младински организации, ученички и студентски здруженија, политички подмладоци и други форми на младинска активност.
Целта на Собранието е да овозможи активен придонес на младите во подготовка на документи, учество во активности, како и избор на членови на Локалниот младински совет на Општина Прилеп.
За учество, заинтересираните организации треба да достават пакет документи, вклучувајќи образец за номинација, мотивационо писмо, CV на кандидатите и годишен извештај за работата на организацијата.
Рокот за пријавување е до 19 февруари 2026 година, а членовите на Локалното собрание на млади ќе бидат избрани со тајно гласање.
