Кај новороденчето од Ресен, кое почина на 15 јуни при транспортот од Битолската болница за Детската клиника во Скопје, дијагностициран е респираторен дистрес синдром, а причината поради која настанала смрт 30 часа по раѓањето е затајување на кардиореспираторниот систем ова е наведено во соопштението на Државниот здравствен и санитарен инспекторат по вонредниот инспекциски надзор направен во Клиничката болница во Битола, на Детската клиника во Скопје и во приватна гинеколошка ординација во Битола. Во соопштението се вели дека не се констатирани други неправилности. Но, ДЗСИ ќе иницира формирање на Комисија за стручен надзор од Министерството за здравство за понатаму да се утврди дали имало пропусти при лекувањето на родилката и новороденчето.
„Согласно надлежностите, ДЗСИ ќе иницира формирање на Комисија за стручен надзор До Министерството за здравство со цел да се утврди дали има пропусти во начинот на лекување на родилката и новороденото кај кое настапил смртен исход 30 часа по породувањето.“ – стои во соопштението на ДЗСИ.
Според извештајот, бебето се родило на 14 јуни со АПГАР 5/7/7 со ливидна кожа, ослабен тонус, рефлекси и брадикардија. Веднаш била направена аспирација, вештачка вентилација и срцева масажа и ординирана терапија. Другиот ден состојбата му се влошила и било транспортирано за Скопје. По патот дошло до дополнително влошување на состојбата и брадикардија. Била спроведена реанимација, но без одговор. Починало на 15 јуни во 16.55 часот. Телото од скопската клиника било вратено назад за Битола.
Извор: 24vesti.mk
