Извештаи: Кина воспоставила шпионска база во Куба од најмалку 2019 година

ВАШИНГТОН (АА) – Кина воспоставила шпионска база на Куба од 2019 година, па и порано, се вели во веста на американскиот весник „Вол стрит журнал“, цитирајќи ја Белата куќа за наводите дека Пекинг ги проширува напорите за собирање разузнавачки информации за Соединетите Американски Држави (САД), пренесува Анадолу.

„Вол стрит журнал“ објави за нагласувањето на Белата куќа дека администрацијата на Бајден има спроведено мерки против ширењето на безбедносното присуство на Кина на глобално ниво.

Весникот првично во четвртокот објави дека властите во Куба се согласиле да ѝ дозволат на Кина да формира тајна шпионска база што Пекинг планира да ја користи за да ги надгледува САД.

Пентагон ги негираше тврдењата дека Кина постигнала таков договор со Куба за воспоставување база во островската држава.

Наводите дека Кина има план да воспостави објект за електронско разузнавање на Куба, како што е објавено во „Вол стрит журнал“, цитирајќи „американски официјални лица запознаени со доверливите разузнавачки информации“, „не се точни“, изјави за новинарите портпаролот на Пентагон, Патрик Рајдер.

Но во вчерашното соопштение од Белата куќа се вели дека администрацијата на Бајден била информирана за напорите на Кина да го зајакне своето воено и разузнавачко присуство што го вклучува и она во Куба.

Белата куќа истакна дека Кина „ќе продолжи да се обидува да го зајакне своето присуство во Куба и ние ќе продолжиме да работиме за да го попречиме тоа“, објави „Вол стрит журнал“.

„Сметаме дека (Народна Република Кина) НРК не е токму онаму каде што се надева дека ќе биде“, се вели во веста.

Станицата ќе ѝ овозможи на Кина да врши електронско прислушување на САД на само 160 километри од сојузната американска држава Флорида.

Базата ќе ѝ дозволи на Кина да собира комуникации низ југоисточниот дел на САД, каде што се лоцирани неколку воени бази и да го надгледува транспортниот сообраќај.

Веста на „Вол стрит журнал“ доаѓа во време на сè позатегнати односи меѓу Вашингтон и Пекинг, а американските официјални претставници алармираат дека Кина претставува главна закана за позицијата на Вашингтон во светот.

Официјални претставници од двете земји работеа на подобрување на односите по откривањето на, како што тврди администрацијата на Бајден, таен кинески шпионски балон над континенталниот дел на САД.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..