БЕЈРУТ (АА) – Израелските воздухопловни сили го бомбардираа седиштето на телевизискиот канал Ал-Сират во предградието на Бејрут доцна синоќа, што е прв напад врз либанска медиумска институција од почетокот на офанзивата против Либан.
Како што јави дописникот на Анадолу, во јужните предградија на Бејрут во израелски воздушен напад беше погодено седиштето на ТВ Ал-Сират, која го поддржува Хезболах. Целосно е уништена зградата со седиштето на телевизијата.
Непосредно пред нападот, израелската војска нареди персоналот да ја напушти зградата, тврдејќи дека локацијата се користи за производство на „муниција“.
Во нападот нема повредени.
Хезболах подоцна негираше дека складирал оружје во цивилните згради погодени од израелските авиони, вклучувајќи го и седиштето на телевизијата Ал-Сират.
Од 23 септември, Израел започна масовни воздушни напади врз „локации на Хезболах низ Либан“, при што загинаа повеќе од 1.057, а беа повредени повеќе од 2.950, според либанското Министерство за здравство.
Хезболах и Израел разменуваат прекуграничен оган од почетокот на израелската војна во Газа, во која загинаа речиси 41.600 луѓе, главно жени и деца, по прекуграничниот напад на Хамас минатиот 7 октомври.
Меѓународната заедница предупреди дека израелските напади врз Либан би можеле да го ескалираат тековниот конфликт во Газа во поширока регионална војна.
Извор: Anadolu Agency (AA)
