МОСКВА (АА) – Одѕивот на гласачите на претседателските избори во Русија надмина 55 отсто на вториот ден од гласањето, соопшти синоќа Централната изборна комисија на Русија, јавува Анадолу.
Тридневното гласање за избор на следниот претседател започна во петокот, а актуелниот претседател Владимир Путин бара петти мандат.
Останатите тројца кандидати се Владислав Даванков од Новата народна партија, Леонид Слуцки од Либерално-демократската партија на Русија и Николај Харитонов од Комунистичката партија.
Претседателката на руската Централна изборна комисија, Ела Памфилова, на брифингот со новинарите во Москва изјави дека во Русија се отворени повеќе од 94.000 избирачки места. Може да се гласа од 8 до 20 часот по локално време, а отворени се 295 избирачки места во 144 земји во странство.
Гласачите имаат можност да гласаат и онлајн на порталот Државни услуги.
Првиот ден од гласањето беше одбележан со зголемена активност, со излезност од 36,12 отсто, соопшти Централната изборна комисија.
Комисијата извести и за осум инциденти кога лица се обиделе да запалат објекти каде што се наоѓале избирачки места.
Интернет-провајдерите во Русија пријавија зголемен број ДДОС-напади од Украина и Северна Америка, истакнувајќи дека имало повеќе од 90.000 обиди за напади врз ресурсите на Централната изборна комисија, порталот за Државни услуги и други владини веб-страници.
Првите резултати од претседателските избори во Русија се очекуваат вечерва по 21:00 часот по московско време.
Извор: Anadolu Agency (AA)
