ТЕХЕРАН (АА) – Шефот на иранското правосудство, Мохсени Еџеи, денес изјави дека околу 22.000 лица што биле приведени за време на повеќемесечните протести во Иран се помилувани, јавува Анадолу.
Обраќајќи се на состанокот на највисокиот судски совет, Еџеи рече дека досега 82.000 луѓе се помилувани по декретот издаден од иранскиот врховен лидер, ајатолахот Али Хамнеи.
„Од нив, 22.000 луѓе беа осудени за време на немирите или беа помилувани пред да бидат изречени правните пресуди“, додаде тој.
Околу 25.000 или беа ослободени од затвор или им беа поништени затворските казни, додека на останатите (34.000) им беа намалени казните.
Шефот на правосудството, пак, појасни дека обвинетите за „насилни кривични дела и кражби“ не се опфатени со општата амнестија.
Амнестијата опфаќа голем број случаи на оние на кои им се суди или беа осудени поради повеќемесечните масовни демонстрации и немири по смртта на младата Махса Емини.
Според иранските власти, најмалку 200 луѓе биле убиени во немирите, додека западните групи за човекови права проценуваат дека повеќе од 500 загинале.
На листата на амнестирани не можеа да се најдат поединци кои се товарат за тешки кривични дела како што се шпионажа за странци, контакт со странски разузнавачки служби, извршување воени злосторства, намерно убиство или ранување, уништување и палење на воени или јавни објекти, членство во субверзивни групи и оние со повеќе криминални досиеја.
Извор: www.aa.com.tr
