Поранешниот албански политичар, Имер Селмани, ги коментираше последните случувања во рамки на владејачката коалиција ВЛЕН, по заминувањето на Арбен Таравари. Во јавна изјава, Селмани оценува дека најголемата вредност моментално во оваа коалиција е првиот вицепремиер, Изет Меџити, поради поконсолидираната партиска структура со која располага.
Според него, во последните месеци можеше да се забележи еден вид дуализам во ВЛЕН помеѓу Таравари и Меџити, не само преку нивните јавни изјави, туку и во тивката трка за тоа кој ќе биде суштински лидер на овој владејачки блок, лидер кој носи промени и реформирање на општеството.
„Ако навистина имаше вистинско соочување за лидерство во ВЛЕН, сметам дека тука Изет има стекнато подобра позиција“ потенцираше Селмани, додавајќи дека сега се ќе зависи од тоа како оваа предност ќе се искористи на терен.
