Во услови на интензивна глобализација, на многу „мали” јазици им се заканува исчезнување. Иако сме релативно малку зборувачи, ние не го сметаме македонскиот јазик за загрозен, затоа што е кодифициран и 80 години зад него стои македонската држава преку наставата на македонски јазик, преку илјадниците уметнички дела и милионите објавени книги, вели директорката на Институтот за македонски јазик „Крсте Мисирков”, Елена Јованова-Грујовска. На денешното одбележување на Меѓународниот ден на мајчиниот јазик 21 Февруари што се одржа во Институтот, Јованова-Грујовска рече дека сепак, наша должност е будно да внимаваме на правилната употреба на стандардниот македонски јазик.
„Истовремено, да го поддржуваме стремежот за негување на мајчините јазици на нашите сограѓани и соседи. Почитувањето на различните култури и на различните јазици произлегува од многувековната борба за слобода и за признавање на македонскиот јазик заедно со македонската држава. Затоа почитувањето на сопствените корени, традиции и народната мудрост, мора да се преточи во завештание за идните генерации со порака за толеранција, прифаќање и респект кон различностите“, рече директорката.
Министерот за култура и туризам Зоран Љутков рече дека мајчиниот јазик е повеќе од средство за комуникација, тој е темел на нашиот идентитет, чувар на културното наследство и мост кон идните поколенија.
„Преку мајчиниот јазик ја пренесуваме својата приказна на светот, го чуваме духот на народот и го обликуваме нашето место во историјата. Ниту едно друго наследство не е толку интимно и толку моќно како зборот што го носиме во срцата. Затоа, да не дозволиме никогаш да се замолкне. Да го зборуваме гордо, да го чуваме во срцата, да го пишуваме со љубов и почит. Како што еднаш нè учеше Петре М. Андреевски: ‘Овој јазик е нашиот завет. Со него се раѓаме и умираме’“, рече министерот.
Меѓународниот ден на мајчиниот јазик се одбележува на 21 февруари секоја година и има за цел да ја промовира јазичната и културната разновидност и повеќејазичноста. Овој ден е прогласен од УНЕСКО во 1999 , во чест на четворицата студенти кои загинаа во Бангладеш во 1952, борејќи се за признавање на нивниот мајчин јазик, бенгалскиот.
ИЗВОР: sdk.mk
