САНА (АА) – Проиранската група Хуси во Јемен објави дека ја нападнале воздухопловната база Неватим на југот на Израел со „хиперсонична балистичка ракета“, известува Анадолу.
Јахја Сари, воен портпарол на Хусите, го потврди нападот во видеото објавено на неговиот профил на социјалните мрежи.
Тој истакна дека со хиперсонична балистичка ракета „Палестина 2“ извршиле воена операција врз воздухопловната база Неватим во регионот Негев, на југот на Израел.
Портпаролот Сари изјави дека балистичката ракета директно ја погодила целта.
Тој додаде дека нападите на Хусите врз Израел ќе продолжат сѐ додека не се укине блокадата на Појасот Газа и не завршат израелските напади во Газа и во Либан.
Во знак на солидарност со Појасот Газа, кој се соочува со разорни израелски бомбардирања и гранатирања, Хусите ги гаѓаат со проектили и со беспилотни летала ги напаѓаат израелските товарни бродови во Црвеното Море или оние кои се поврзани со Тел Авив и вршат напади врз Израел.
Извор: Anadolu Agency (AA)
